- By Keti Khomeriki
- In პოლიტიკა
ეკა სეფაშვილი – ვაშინგტონში ვიზიტისას გამოითქვა მზაობა, რომ საქართველოსა და აშშ-ს შორის გაფორმდეს ახალი სტრატეგიული შეთანხმება
საპარლამენტო დელეგაციის ვიზიტი უკვე დასასრულს მიუახლოვდა ვაშინგტონში, ჩვენ ძალიან ბევრი პოზიტიური შეხვედრა გვქონდა, სადაც გამოითქვა მზაობა იმისა, რომ საქართველოსა და ამერიკის შეერთებულ შტატებს შორის გაფორმდეს ახალი სტრატეგიული შეთანხმება, – ამის შესახებ ,,ხალხის ძალის“ წევრმა, ეკა სეფაშვილმა განაცხადა.
მისი თქმით, ახალი შეთანხმება კონკრეტული შედეგებით და კონკრეტული მიმართულებებით იქნება გამორჩეული.
,,აღსანიშნავია, რომ ყველა ეს შეხვედრა მიმდინარეობდა უაღრესად მეგობრულ და თბილ გარემოში და ის ადამიანები, რომლებიც ჩვენ შევხვდნენ და მათ შორის სენატორები, კონგრესმენები, სხვადასხვა წარმომადგენელი საკმაოდ კარგად ფლობდნენ ინფორმაციას საქართველოს შესახებ, კარგად ესმოდათ ის არგუმენტები, რომლებიც ჩვენ გვქონდა და იცნობდნენ იმ პოლიტიკურ თუ უსაფრთხოების გამოწვევას, რის წინაშეც საქართველო დგას. ეს, რა თქმა უნდა, არის დადებითი მომენტი, იმ თვალსაზრისით, რომ ისინი აცნობიერებენ საქართველოს მდგომარეობას და ამის შესაბამისად იღებენ გადაწყვეტილებას საქართველო-ამერიკის მომავალი ურთიერთობების შესახებ. საუბარი, რა თქმა უნდა, შეეხო იმას, რომ საქართველოს 20 პროცენტი არის ოკუპირებული რუსეთის მიერ და ეს დამატებით გამოწვევებს ქმნის უსაფრთხოების თვალსაზრისით.
აღინიშნა ყველა შეხვედრაზე, როგორც ჩვენი მხრიდან, ასევე ამერიკის შეერთებული შტატების მხრიდან, რომ ჩვენ გვაერთიანებს ღირებულებითი ერთობა, ეს არის ძალიან მნიშვნელოვანი საფუძველი იმისა, რომ სათანადოდ, მაღალ დონეზე განვითარდეს პოლიტიკური და ეკონომიკური, ასევე საგანმანათლებლო და კულტურული ურთიერთობები, რომლებიც ძალიან მნიშვნელოვანია ხალხთა შორის ურთიერთობების განმტკიცებისათვის. შეხვედრებზე ასევე ხაზი გაესვა იმ ეკონომიკურ პოტენციალს, რაც საქართველოს გააჩნია და აგრეთვე იმ გეოსტრატეგიულ მდებარეობას, რომლითაც საქართველოს შეუძლია, მნიშვნელოვანი როლი შეასრულოს გეოსტრატეგიული პროექტების განხორციელებაში, რაშიც ამერიკის შეერთებული შტატების ინტერესი უდავოა და ეს ხელს შეუწყობს, რა თქმა უნდა, ჩვენი სახელმწიფოების ურთიერთთანამშრომლობაზე და ურთიერთპატივისცემაზე დაფუძნებული ურთიერთობების განვითარებას”, – განაცხადა სეფაშვილმა.
