ვახტანგ გომელაურმა აჭარის პოლიციის დეპარტამენტის დანაყოფების ხელმძღვანელებთან სამუშაო თათბირი გამართა
ვიცე-პრემიერმა, შინაგან საქმეთა მინისტრმა, ვახტანგ გომელაურმა და მინისტრის პირველმა მოადგილემ, როლანდ მესხმა ბათუმში, აჭარის პოლიციის დეპარტამენტის დანაყოფების ხელმძღვანელებთან სამუშაო თათბირი გამართეს.
შინაგან საქმეთა სამინისტროს ინფორმაციით, ვახტანგ გომელაურმა აჭარის რეგიონის პოლიციის დეპარტამენტის ხელმძღვანელი პირებისგან დანაშაულის წინააღმდეგ ბრძოლისა და პრევენციული საპოლიციო ღონისძიებების შესახებ ინფორმაცია მოისმინა.
მათივე ცნობით, შეხვედრაზე უწყების პრიორიტეტული მიმართულებები განიხილეს.
„ვახტანგ გომელაურმა ყურადღება გაამახვილა პოლიციელებისთვის ღირსეული სამუშაო გარემოს უზრუნველყოფის მნიშვნელობაზე და ამ მიმართულებით რეგიონში უკვე განხორციელებულ და დაგეგმილ პროექტებზე. შინაგან საქმეთა მინისტრმა დეპარტამენტის წარმომადგენლებს სამუშაო პროცესთან, მათ შორის მოახლოებულ ზაფხულის სეზონთან დაკავშირებით რეგიონში ტურისტებისა და ადგილობრივი დამსვენებლებისთვის უსაფრთხო გარემოს უზრუნველყოფის მიზნით შესაბამისი დავალებები მისცა. შინაგან საქმეთა მინისტრმა დეპარტამენტის თანამშრომლებს გაწეული ეფექტიანი საქმიანობისთვის მადლობა გადაუხადა და პროფესიულ საქმიანობაში წარმატებები უსურვა“, – აღნიშნულია შინაგან საქმეთა სამინისტროს ინფორმაციაში.
