თბილისსა და რეგიონებში „ერთობის ჯაჭვის“ აქცია იმართება
თბილისსა და რეგიონებში დღეს „ერთობის ჯაჭვის“ აქცია იმართება.
დედაქალაქში პროტესტის მონაწილეები რამდენიმე ადგილზე, კერძოდ შვიდ ხიდზე შეიკრიბნენ და ერთმანეთს „ცოცხალი ჯაჭვით“ დაუკავშირდნენ. აქციის მონაწილეებს შორის არიან სხვადასხვა პოლიტიკური ჯგუფის, პროფესიისა და სფეროს წარმომადგენლები.
აქციის მონაწილეების განცხადებით, დღევანდელი აქციით მათ უნდათ აჩვენონ, რომ ერთიანი არიან მოთხოვნებში, რომ დაინიშნოს ხელახალი არჩევნები და გათავისუფლდნენ აქციების მიმდინარეობისას დაკავებული მოქალაქეები.
„ერთობის ჯაჭვში“ ჩაერთო საქართველოს პრეზიდენტი სალომე ზურაბიშვილიც, რომელიც აქციას ზაარბრიუკენის მოედანზე შეუერთდა.
„ერთობის ჯაჭვის“ აქციაზე იმყოფებიან პოლონელი ევროპარლამენტარი მიხაუ ვავრიკევიჩი და ლიეტუველი ევროპარლამენტარი დაინიუს ჟალიმასი, რომლებიც მანამდე ოპოზიციის წარმომადგენლებს, შემდეგ კი, სალომე ზურაბიშვილს შეხვდნენ.
