- By Keti Khomeriki
- In პოლიტიკა
ირაკლი ჩიქოვანი უნგრეთის თავდაცვის ძალების გენერალური შტაბის უფროსს შეხვდა
თავდაცვის მინისტრი ირაკლი ჩიქოვანი საქართველოში ოფიციალური ვიზიტით მყოფ უნგრეთის თავდაცვის ძალების გენერალური შტაბის უფროსს, გენერალ გაბორ ბორონდის შეხვდა.
მინისტრმა უნგრეთის მხარეს საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის მადლობა გადაუხადა და ქვეყნებს შორის თანამშრომლობის დადებით დინამიკაზე გაამახვილა ყურადღება. მან ხაზგასმით აღნიშნა ორ ქვეყანას შორის გაფორმებული სტრატეგიული პარტნიორობის შესახებ ერთობლივი დეკლარაციისა და თავდაცვის სფეროში თანამშრომლობის დოკუმენტის მნიშვნელობა. თავდაცვის სამინისტროში გამართულ შეხვედრაზე, მხარეებმა საქართველოსა და უნგრეთის თავდაცვის უწყებებს შორის გაფორმებული ორმხრივი გეგმით გათვალისწინებული მიმართულებები მიმოიხილეს. საუბარი შეეხო ასევე, რეგიონსა და მსოფლიოში არსებულ უსაფრთხოების გარემოს.
მინისტრთან შეხვედრამდე, თავდაცვის უწყებაში უნგრეთის თავდაცვის ძალების გენერალური შტაბის უფროსის დახვედრის ოფიციალური ცერემონია გაიმართა. უნგრელ გენერალს მისი კოლეგა, საქართველოს თავდაცვის ძალების მეთაური, გენერალ-ლეიტენანტი გიორგი მათიაშვილი მასპინძლობს. მან გენერალ გაბორ ბორონდის ვიზიტისთვის მადლობა გადაუხადა და საქართველოს თავდაცვის ტრანსფორმაციის პროცესსა და SNGP წარმატებით განხორციელებაში უნგრეთის წვლილი აღნიშნა. შეხვედრაზე საქართველოსა და უნგრეთს შორის თავდაცვის სფეროში, სამხედრო განათლების, სამხედრო სწავლებებისა და სამხედრო მედიცინის კუთხით არსებული თანამშრომლობის საკითხები განიხილეს და სამომავლო პერსპექტივები დასახეს.
უნგრეთის თავდაცვის ძალების გენერალური შტაბის უფროსი, გენერალი გაბორ ბორონდი საქართველოში ორდღიანი ოფიციალური ვიზიტით იმყოფება. მან საქართველოს ტერიტორიული მთლიანობისათვის ბრძოლებში დაღუპულ გმირთა ხსოვნას პატივი მიაგო და გმირთა მემორიალი გვირგვინით შეამკო. უნგრელი სტუმრები კრწანისში, ნატო-საქართველოს წვრთნებისა და შეფასების ერთობლივ ცენტრშიც (JTEC) იმყოფებოდნენ.
ინფორმაციას საქართველოს თავდაცვის სამინისტრო ავრცელებს.
