BLOG

• By Keti Khomeriki
• In ექსკლუზივი - სტატიები, კულტურა, საზოგადოება

ირინოლა ტყეშაველის ღრმად შთამაგონებელი პოეზია

,,GEO NEWS” გთავაზობთ ქალბატონი ირინოლა ტყეშაველის ( ირინა ხურციძის ) შემოქმედებიდან ჩვენთვის გამორჩეულ რამდენიმე ლექსს, რაც ვფიქრობთ ჩვენს მკითხველს, ვინც პოეზიიითაა დაინტერესებული ღრმა ესთეტიკურ სიამოვნებას მიანიჭებს. 

ქალბატონი ირინა საბერძნეთში მყოფი ჩვენი თანამემამულეა, პოეტი და საქართველოს მწერალთა შემოქმედებითი კავშირის წევრია. 

მისი პოეზია გამორჩეულია ღრმა რეფლექციითა და სრულად გადმოსცემს ადამიანური ემოციების მრავალშრიანობას. 

დუმილს ნუ ჩამითვლით სიმუნჯედ…

ფრთებს როს ვშლი უცნაურ სივრცეში,
საკუთარ სამყაროს ვიუნჯებ,
ჩაკეცილ დღიურის ფურცელს ვშლი ,
დუმილს ნუ ჩამითვლით სიმუნჯედ…

თვალ მომჭრას იქნება, ვინ იცის,
გაშლილი ლაჟვარდის სილურჯემ,
მზე ახლა იმგვარად მიცინის,
ცრემლებით ვასველებ ცის ფუნჯებს…

ღრუბელი ბალიშებს დამიფენს,
იქ სადაც ქარაფი მიმუხთლებს,
ცხოვრება ლოდია სიზიფეს,
ნუ გიკვირთ, თუ წამით ვიმუხლებ….

დამითმეთ, სულ ამ ერთ სიცოცხლედ,
უბრალო ფერები აკრილის,
ოღონდაც მჯეროდეს, ვიცოდე,
რომ მოვა კვლავ ჩემი აპრილი…

ფრთებს როს ვშლი უცნაურ სივრცეში,
საკუთარ სამყაროს ვიუნჯებ,
ჩაკეცილ დღიურის ფურცელს ვშლი ,
დუმილს ნუ ჩამითვლით სიმუნჯედ…

შორს, ჰორიზონტზე გამექცა მზერა_
გავდა სამყარო უფერო ტილოს,
ახლა რომ მავანთ თვალები მზვერავს,
გავექცე ქირდვას_ ამაოდ ვცდილობ…

ვერ დაიტია ღრუბელი მსუყე_
გახია ზეცა წვერმა ხმლით ელვის,
დავეძებ ფიქრის საძირკველს, ურყევს,
კვლავინდებურად სულის წვა-ღელვით.

გავთელე გზები ამაო ბოდვით,
სადა ხარ ახლა!, _გპოულობ რად ვერ…
არ ვიქნებოდი ჩამდენი ცოდვის_
ვშობილიყავი ნეტავი ბრმადვე…

შორს, ჰორიზონტზე გამექცა მზერა_
გავდა სამყარო უფერო ტილოს,
ახლა რომ მავანთ თვალები მზვერავს,
გავექცე ქირდვას_ ამაოდ ვცდილობ…

ცხოვრებისაგან დაგეშილს,
მთვარემ ჩამხედა თვალებში.
ჩემგან თუ უნდა გამეშვი,
ასეთ ყიამეთ ღამეში,

ალბათ ეს ბედი გვეწერა,
როგორაც ხდება ზღაპრებში…
ფეხებზე ხუნდი ამეხსნა,
ცაში მტრედივით ამეშვი,

წადი და სულ დამეკარგე,
ფერმიმქრალ ღრუბლის არვეში…
მერე ეღირსა, გათენდა,
მზემაც შემხედა ალერსით,
თუმც მაინც შემომეწერა,
სტრიქონი დარდით ნალესი….

,,GEO NEWS”