- By Keti Khomeriki
- In მსოფლიო
მარკო რუბიო – უკვე დავარტყით რუსეთის უმსხვილეს ნავთობკომპანიებს, სწორედ ამას ითხოვდა ყველა, აღარაფერი დარჩა, რაზეც სანქციების დაწესება შეგვიძლია
აშშ-ის სახელმწიფო მდივანმა, მარკო რუბიომ „დიდი შვიდეულის“ (G7) ქვეყნების საგარეო საქმეთა მინისტრების შეხვედრის შემდეგ განაცხადა, რომ ვაშინგტონმა რუსეთის წინააღმდეგ სანქციების გამკაცრების თვალსაზრისით საკუთარი პოტენციალი ამოწურა.
მისი თქმით, აღარაფერი დარჩა, რისი დასანქცირებაც შესაძლებელია.
„აღარაფერი დარჩა, რისი დასანქცირებაც შეიძლება. ვგულისხმობ იმას, რომ ჩვენ უკვე დავარტყით მათ უმსხვილეს ნავთობკომპანიებს. სწორედ ამას ითხოვდა ყველა. ცხადია, ეს უნდა განხორციელდეს და მის ამოქმედებას გარკვეული დრო დასჭირდება, ვიდრე ისინი შესამჩნევი გახდება. მაგრამ არ ვიცი, კიდევ რა შეიძლება, გაკეთდეს. ვგულისხმობ, რომ ამ მხრივ აღარ დარჩა არაფერი, რაზეც სანქციების დაწესება შეგვიძლია“, – აღნიშნავს მარკო რუბიო.
კითხვაზე, სურს თუ არა რუსეთს სინამდვილეში მშვიდობა, აშშ-ის სახელმწიფო მდივანმა განაცხადა, რომ აშშ-ს შეუძლია, მხოლოდ იმის მიხედვით იმსჯელოს, რასაც ხედავს.
„ჩვენ შეგვიძლია, მხოლოდ იმის მიხედვით ვიხელმძღვანელოთ, რასაც ვხედავთ. ვფიქრობ, მოსკოვმა ნათლად განაცხადა, რომ მათ დონეცკის ოლქის დარჩენილი ნაწილის დაკავება სურთ. ცხადია, უკრაინელები ამას არ დათანხმდებიან“, – აცხადებს რუბიო.
