- By Keti Khomeriki
- In პოლიტიკა
მიხეილ ყაველაშვილი უზბეკეთის საგარეო საქმეთა მინისტრს, ბახტიორ საიდოვს შეხვდა
საქართველოს პრეზიდენტი მიხეილ ყაველაშვილი უზბეკეთის რესპუბლიკის საგარეო საქმეთა მინისტრს, ბახტიორ საიდოვს შეხვდა.
შეხვედრაზე ორ ქვეყანას შორის არსებული ურთიერთობები და თანამშრომლობის სამომავლო პერსპექტივები განიხილეს. საქართველოს პრეზიდენტმა უზბეკეთის რესპუბლიკის საგარეო საქმეთა მინისტრს საქართველოს სუვერენიტეტისა და ტერიტორიული მთლიანობის მხარდაჭერისთვის მადლობა გადაუხადა.
მიხეილ ყაველაშვილის განცხადებით, საქართველო აფასებს და დიდ მნიშვნელობას ანიჭებს ქვეყნებს შორის არსებულ მეგობრულ ურთიერთობას, რომელიც ნდობას, ურთიერთპატივისცემასა და ერთმანეთის ეროვნული ინტერესების გათვალისწინებას ეფუძნება.
„მჭიდრო პოლიტიკური და ეკონომიკური ურთიერთობების გათვალისწინებით, საქართველო უზბეკეთს განიხილავს არა მხოლოდ როგორც მნიშვნელოვან და საიმედო პარტნიორს, არამედ როგორც მეგობარ სახელმწიფოს. მზად ვართ გავაღრმაოთ ორმხრივი თანამშრომლობა პოლიტიკური, ეკონომიკური, კულტურული მიმართულებით და ჩვენი წვლილი შევიტანოთ სამხრეთ კავკასიისა და ცენტრალური აზიის რეგიონების პოტენციალის უკეთ ათვისებასა და ჩვენი ქვეყნებისთვის მეტი კეთილდღეობის შექმნაში“, – განაცხადა მიხეილ ყაველაშვილმა.
შეხვედრაზე პრეზიდენტმა აღნიშნა, რომ საქართველო უზბეკეთს ერთ-ერთ მნიშვნელოვან პარტნიორად განიხილავს, შესაბამისად, ქვეყანა დაინტერესებულია ინვესტიციების მოზიდვის მიმართულებით თანამშრომლობით.
პრეზიდენტის სასახლეში გამართულ შეხვედრას სტუმართა მხრიდან: უზბეკეთის რესპუბლიკის საგარეო საქმეთა მინისტრის მოადგილე, საქართველოში უზბეკეთის რესპუბლიკის საგანგებო და სრულუფლებიანი ელჩი და უზბეკეთის რესპუბლიკის საგარეო საქმეთა მინისტრის მრჩეველი, ხოლო საქართველოს მხრიდან, საქართველოს საგარეო საქმეთა მინისტრის მოადგილე, საქართველოს პრეზიდენტის ადმინისტრაციის უფროსი, საქართველოს საგანგებო და სრულუფლებიანი ელჩი უზბეკეთის რესპუბლიკაში და საქართველოს პრეზიდენტის მრჩეველი დაესწრნენ.
ინფორმაციას საქართველოს პრეზიდენტის პრესსამსახური ავრცელებს.
