რა გეგმა აქვს ,,მადამ” ზურაბიშვილს 29 დეკემბრის შემდეგ ?
ზუსტად 6 დღე პრეზიდენტად და შესაბამისად, 6 დღე ორბელიანების სასახლის დასატოვებლად. სალომე ზურაბიშვილი საპრეზიდენტო კარიერას ასრულებს, თუმცა იქამდე სანამ ეს ოფიციალურ სახეს მიიღებს, კონსტიტუციის დარღვევაში მხილებული სალომე ზურაბიშვილი, ვადის ამოწურვასთან ერთად, სახეს სულ უფრო კარგავს.
29 დეკემბრამდე ზურაბიშვილი პრეზიდენტის ადმინისტრაციაში ბიძინა ივანიშვილს იბარებს და როგორც ის ამბობს, მხოლოდ ხელახალ არჩევნევზე სასაუბროდ. დასახელებული აქვს კონკრეტული თარიღიც და ეს 29 დეკემბერია. სწორედ ამავე დღემდე ითხოვს ის ხელახალი არჩევნების ჩატარებას.
რატომ 29 დეკემბერი, ეს უცნობია. ასევე, უცნობია მისი გეგმები – რას იზამს ახალი პრეზიდენტის ინაუგურაციის შემდეგ. ცნობილია მხოლოდ ის, რომ ზურაბიშვილი ორბელიანების სასახლის დატოვებას არ აპირებს.
ხელახალი არჩევნები არ იქნება, ასეთია სახელისუფლებო გუნდის მკაფიო გზავნილი და შესაბამისად, ზურაბიშვილისა და რადიკალების გეგმა ოცნებად რჩება. მეტიც, ,,ქართულ ოცნებაში”, ამბობენ იმასაც, რომ დღეს ქვეყანაში ახალი არჩევნების ჩატარების აუცილებლობა დღის წესრიგში არ დგას.
მმართველ პარტიას სალომე ზურაბიშვილისთვის კიდევ ერთხელ უწევს იმის შეხსენება, რომ ის საპრეზიდენტო კარიერას კონსტიტუციის დამრღვევი პრეზიდენტის სტატუსით ასრულებს და ამავე კონსტიტუციის მიხედვით, რომელიც ზურაბიშვილმა დაარღვია წერია, რომ დადგენილი ნორმის იგნორირება სისხლის სამართლის დანაშაულია. კონსტიტუციის არ ცოდნა ან უგულებელყოფა, ეს განცდა რჩებათ მმართველ პარტიაში ზურაბიშვილის განცხადებებზე.
29 დეკემბერი და მიხეილ ყაველაშვილის ინაუგურაცია წითელი ხაზია რადიკალებისთვის, რომლებიც კვლავ ბოიკოტის რეჟიმში არიან, პარლამენტს არალეგიტიმურად აცხადებენ და შესაბამისად, არც მიხეილ ყაველაშვილს აღიარებენ. ამიტომ კოლექტიური ,,ნაცმოძრაობის” საზრუნავი ახლა სალომე ზურაბიშვილის თანამდებობაა, რომელიც დასასრულს უახლოვდება.
ირაკლი გუნია
