საქართველოს ადვოკატთა ასოციაციის თავმჯდომარის არჩევნები და გამოწვევები
საქართველოს ადვოკატთა ასოციაცია, როგორც იურისტთა ყველაზე მრავალრიცხოვანი პროფესიული გაერთიანება ქვეყანაში, გადამწყვეტი არჩევნების მოლოდინშია.
2025 წლის 14 დეკემბერს დაგეგმილია საერთო კრება, სადაც თავმჯდომარე, აღმასრულებელი საბჭოს, ეთიკისა და სარევიზიო კომისიების წევრები აირჩევიან, განმსაზღვრელი იქნება პროფესიული ორგანიზაციის მომავალი ოთხი წლისთვის. ამჟამინდელი სიტუაცია გამოირჩევა მაღალი კონკურენციითა და ასოციაციის როლისა და ფუნქციების შესახებ არსებული ფუნდამენტური დაპირისპირებით.
არსებული პრობლემების იდენტიფიცირება :
კანდიდატებისა და საადვოკატო საზოგადოების განცხადებებიდან იკვეთება რამდენიმე ძირითადი პრობლემა, რომელთა ირგვლივ მიმდინარეობს წინასაარჩევნო კამპანია.
პოლიტიკური ნეიტრალიტეტი VS აქტიური პოზიცია :
კრიტიკოსები აღნიშნავენ, რომ ბოლო წლებში ასოციაცია იყო „მდუმარე“ და „სრულიად სტერილური“ ქვეყანაში მიმდინარე მნიშვნელოვან პროცესებთან, მართლმსაჯულების პრობლემებთან და ადვოკატის უფლებების დარღვევის ფაქტებთან დაკავშირებით.
მოქმედი ხელმძღვანელობა ( დავით ასათიანი ) კი აცხადებს, რომ ასოციაცია იყო და უნდა დარჩეს პოლიტიკურად სრულიად ნეიტრალური ( აპოლიტიკური ) , რათა არ მოხდეს მისი მარგინალიზაცია და პროფესიის დესტაბილიზაცია. ეს არის მთავარი იდეოლოგიური განხეთქილება.
ერთპიროვნული / მონოპოლიზებული მმართველობა ?
წინა პლანზეა წამოწეული საკითხი იმის შესახებ, რომ ასოციაციის მართვის ორგანოები ( თავმჯდომარე, აღმასრულებელი საბჭო ) 10 წელზე მეტია, ერთი გუნდის მიერ კონტროლდება, რაც ეწინააღმდეგება კოლეგიური და გამჭვირვალე მმართველობის პრინციპებს.
ადვოკატის უფლებრივი და სოციალური მდგომარეობა :
ხაზგასმულია ადვოკატის სოციალური და სამართლებრივი მდგომარეობის გაუარესება, პროფესიის დაცვის დაბალი ხარისხი სისტემასთან ბრძოლის დროს და ინდივიდუალური ადვოკატების ინტერესების არასაკმარისი დაცვა.
შიდა დემოკრატია და გამჭვირვალობა :
საქართველოს იურიდიული ფირმების ასოციაცია ( „სიფა“ ) და სხვა ჯგუფები მოითხოვენ კოლეგიურ, ალიანსის ტიპის მმართველობას, სადაც გადაწყვეტილებები გამჭვირვალედ მიიღება და ისმის ყველა ჯგუფის ხმა.
გამორჩეული კანდიდატები და მათი პოზიციები ( ნეიტრალური პლატფორმა ) :
არჩევნებში თავმჯდომარის პოზიციისთვის რამდენიმე კანდიდატი იბრძვის. ამ ეტაპისთვის, ძირითადი ყურადღება გამახვილებულია შემდეგ ფიგურებზე :
კანდიდატი ძირითადი პროგრამული დაპირებები / ხედვა იდენტიფიცირებული პრობლემის გადაჭრის გზა –
ირაკლი ჩომახაშვილი „მდუმარე მმართველობის დასრულება“ და პროფესიის გაძლიერება. ასოციაციის როლის გააქტიურება ქვეყნის დემოკრატიულ პროცესებში, მთავრობის კრიტიკა მართლმსაჯულების საკითხებზე. ახალი გუნდისა და ხედვის შეთავაზება, რომელიც ადვოკატის სოციალური და სამართლებრივი მდგომარეობის გაუმჯობესებაზე იქნება ორიენტირებული.
ირაკლი ყანდაშვილი ( ზუსტი პროგრამა საჯარო წყაროებში ნაკლებად არის დეტალიზებული ამ ეტაპზე ) – სავარაუდოდ, აქცენტი გაკეთდება ადვოკატის უფლებების დაცვასა და პროფესიული სტანდარტების ამაღლებაზე.
მუხრან ღურწკაია ( ზუსტი პროგრამა საჯარო წყაროებში ნაკლებად არის დეტალიზებული ამ ეტაპზე ) – სავარაუდოდ, ყურადღება დაეთმობა ასოციაციის შიდა მმართველობის გაუმჯობესებასა და ადვოკატთა პროფესიული საჭიროებების დაკმაყოფილებას.
ცნობისთვის, დავით ასათიანი ( მოქმედი თავმჯდომარე ) მხარს უჭერს ირაკლი ყანდაშვილს, ისინი ერთი გუნდის წევრები არიან და ბევრი საერთო ინტერესი და კვეთა გააჩნიათ ჯერ კიდე არასამთავრობო სექტორში საქმიანობის დროიდან.
ასოციაციის დაცვა „გარე ჩარევისგან“ და პოლიტიზირებისგან – აქცენტი პროფესიული გაერთიანების ფუნქციაზე და არა რომელიმე პოლიტიკურ ძალასთან აფილირებული აქტივიზმზე.
ანალიტიკური შეჯამება :
არჩევნები საქართველოს ადვოკატთა ასოციაციაში იქცა ბრძოლის ველად ორ ფუნდამენტურ მიდგომას შორის –
პროფესიული იზოლაცია / ნეიტრალიტეტი : მიდგომა, რომელიც მოქმედი ხელმძღვანელობის მიერ არის დაცული და გულისხმობს ასოციაციის დისტანცირებას პოლიტიკური პროცესებისგან, ფოკუსირებას მხოლოდ პროფესიულ და შიდა საკითხებზე.
პროფესიული აქტივიზმი / კოლეგიურობა : მიდგომა, რომელსაც ოპოზიციური კანდიდატები და ჯგუფები, მათ შორის „სიფა“ უჭერენ მხარს. ისინი მოითხოვენ ასოციაციის აქტიურ ჩართვას ქვეყნის მართლმსაჯულების პრობლემების მოგვარებაში, ადვოკატების უფლებების აქტიურ დაცვას და კოლეგიურ მმართველობას.
„სიფას“ პოზიცია ამ კონტექსტში განსაკუთრებით საინტერესოა, რადგან მათ არ წამოაყენეს თავმჯდომარეობის კანდიდატი, მაგრამ აქტიურად უჭერენ მხარს აღმასრულებელი საბჭოს წევრობის კანდიდატებს და ღიად დააფიქსირეს ხედვათა თანხვედრა ირაკლი ჩომახაშვილთან.
მათი მთავარი გზავნილია, რომ ასოციაცია უნდა იმართებოდეს კოლეგიურად აღმასრულებელი საბჭოს მიერ და არა ერთპიროვნულად თავმჯდომარის მიერ.
შედეგად, ადვოკატთა საზოგადოება დგას არჩევანის წინაშე : შეინარჩუნოს სტატუს-კვო პოლიტიკური ნეიტრალიტეტის ლოზუნგით, თუ აირჩიოს აქტივისტური და კოლეგიური მმართველობა, რომელიც მზად იქნება მკვეთრი პოზიცია დააფიქსიროს ქვეყნის სამართლებრივ გამოწვევებზე.
ბოლო დღეებში ამ დაპირისპირებამ დუღილის წერტილს მიაღწია, როდესაც ერთ-ერთი კანდიდატის ბრალდებები საზოგადოებისათვის ცნოიბილი გახდა, რაზეც საპასუხო წერილი თავად ასოციაციის დღევანდელმა მენეჯმენტმაც გაავრცელა.
ორივე მიმართვას სრულად გთავაზობთ :
მუხრან ღურწკაია : ადვოკატთა ასოციაცია ემზადება არჩევნების მასშტაბური გაყალბებისთვის !
ამ წუთებში დასრულდა ადვოკატთა ასოციაციის აღმასრულებელი საბჭოს სხდომა, რომელსაც პირადად ვესწრებოდი. მიუხედავად მწვავე წინააღმდეგობისა და არგუმენტირებული მოთხოვნებისა, მოქმედმა თავმჯდომარემ დავით ასათიანმა და მისმა გუნდმა განზრახ და მიზანმიმართულად უარი თქვეს ყველა იმ გადაწყვეტილებაზე, რომელიც არჩევნების გაყალბებას გამორიცხავდა.
საბჭოს უმრავლესობამ, რომელიც დაუფარავად ლობირებს ირაკლი ყანდაშვილს და მათი უმრავლესობა ი. ყანდაშვილის საარჩევნო სიაშია, მიიღო ისეთი გადაწყვეტილებები, რომლებიც სრულიად ანგრევს სამართლიანი არჩევნების შესაძლებლობას.
მათ ორკესტრირებულად შექმნეს სცენარი, რომლის მიხედვითაც :
სრულ კონტროლს იღებენ საარჩევნო კომისიის დაკომპლექტებაზე;
ადვოკატების საბოლოო სიებზე;
საარჩევნო ოქმებზე და მათი გაცემის წესზე;
ხმის მიცემის პროცესზე;
და რაც ყველაზე საშიშია – შედეგების დათვლასა და გამოცხადებაზე.
ეს ყველაფერი ერთ მიზანს ემსახურება – გააყალბონ შედეგები და გამარჯვება გაუფორმონ ირაკლი ყანდაშვილს.
დღევანდელმა სხდომამ ნათლად აჩვენა, რომ სხვა კანდიდატები მთლიანად გამორიცხეს საარჩევნო პროცესებიდან.
ეს არ არის არჩევნები – ეს არის სცენარი, სადაც შედეგი წინასწარ აქვთ დაწერილი.
ადვოკატებო, ახლა დუმილი ნიშნავს დანებებას !
ჩვენს არჩევანს გვართმევენ !
ჩვენს პროფესიას აჩუმებენ !
მოგიწოდებთ ყველას – დავდგეთ ერთად !
დავიცვათ ჩვენი ხმები, ჩვენი არჩევანი და ჩვენი ღირსება !
შემომიერთდით !
ერთად შევაჩეროთ ეს უპრეცედენტო უსამართლობა !
აქვე გაცნობებთ, რომ ხვალ დილით გავმართავ ბრიფინგს და დეტალურად გაგაცნობთ დახურულ
კარს მიღმა მიმდინარე გაყალბების მომზადების პროცესის დეტალებს.
თქვენი მხარდაჭერა გადამწყვეტია.
თქვენზეა დამოკიდებული, ვიბრძოლებთ და დავიცავთ ჩვენს არჩევანს, თუ დავსხდებით და ვუყურებთ, როგორ გვართმევენ პროფესიულ მომავალს.
ნუ გადგებით გვერდზე !
ეს ბრძოლა ჩვენი საერთო საქმეა !
საქართველოს ადვოკატთა ასოციაცია : მაღალი საზოგადოებრივი ინტერესიდან გამომდინარე, გვსურს გამოვეხმაუროთ ასოციაციის არჩევნებში მონაწილე ერთ-ერთი კანდიდატის – მუხრან ღურწკაიას მიერ გავრცელებულ სრულიად უსაფუძვლო და ცრუ ბრალდებებს აღმასრულებელი საბჭოს მიერ მიღებულ საერთო კრების რეგლამენტთან დაკავშირებით.
2025 წლის 05 დეკემბერს, ასოციაციის აღმასრულებელმა საბჭომ, საჯარო სხდომაზე, რომელსაც ესწრებოდა ყველა დაინტერესებული თავმჯდომარეობის კანდიდატი და მათი არაერთი წარმომადგენელი, განიხილა საერთო კრების რეგლამენტის პროექტი. პროექტის ხანგრძლივი, მუხლობრივი განხილვის საფუძველზე, რომელშიც დაინტერესებულ კანდიდატებთან ერთად, პირადად მონაწილეობდა მუხრან ღურწკაია, გათვალისწინებულ იქნა ყველა კანონშესაბამისი და რელევანტური შენიშვნა თუ წინადადება.
პროექტის მუხლობრივი კენჭისყრის შემდეგ, აღმასრულებელმა საბჭომ ერთიანად უყარა კენჭი პროექტს და ერთხმად დაამტკიცა რეგლამენტის საბოლოო რედაქცია.
აღსანიშნავია, რომ როგორც საბჭოს წევრთა, ისე სხდომაზე დამსწრე სხვა კანდიდატთა მხრიდან რეგლამენტის საბოლოო ვერსიის მიმართ პრეტენზია არ გამოთქმულა.
ასოციაციის აღმასრულებელმა საბჭომ, რეგლამენტის მიღებისას, არ გაიზიარა ისეთი კანონშეუსაბამო და არარელევანტური წინადადებები, როგორიცაა :
საარჩევნო ბიულეტენში კანდიდატის სახელისა და გვარის გვერდით, კონკრეტული თავმჯდომარეობის კანდიდატის გუნდის წევრობის მითითება;
არჩევნების დროს ადვოკატებისთვის მობილური ტელეფონებით სარგებლობის ( ფოტო-ვიდეო გადაღება ) უფლების აკრძალვა;
ხმის დამთვლელი კომისიის შემადგენლობაში თავმჯდომარეობის კანდიდატების წარმომადგენლების პირდაპირ შეყვანა, მაშინ როცა მოქმედი კანონმდებლობით ხმის დამთვლელი კომისიის წევრებს ღია კენჭისყრით ირჩევს საერთო კრება;
ადვოკატებზე მარკირების სითხის გამოყენება და სპეციალური ხმოვანი აპარატების ( დღემდე გაუგებარია რა ხმოვან აპარატებზეა საუბარი ) დადგმა.
საკითხის მაღალი საზოგადოებრივი ინტერესის გათვალისწინებით, მზად ვართ გავასაჯაროოთ, როგორც მუხრან ღურწკაიას განცხადების ტექსტი ზემოაღნიშნული კანონშეუსაბამო და არარელევანტური მოთხოვნებით, ისე საბჭოს სხდომის მიმდინარეობის სრულად ამსახველი მტკიცებულება.
ასოციაციის წევრებს დამატებით ვაცნობებთ, რომ საერთო კრების რეგლამენტი სრულად უზრუნველყოფს ასოციაციის მმართველი ორგანოების არჩევნების სამართლიანად, გამჭვირვალედ და ყველა წევრის თუ კანდიდატის უფლებების დაცვით ჩატარებას.
რეგლამენტში გათვალისწინებულია, როგორც ხმის დამთვლელი კომისიის წევრების კრების მიერ ღიად არჩევის პროცედურა, ისე დამკვირვებლებისა და მედიის ფართო წარმომადგენლობა. კერძოდ, საარჩევნო პროცესის მონიტორინგის მიზნებისთვის, თითოეულ სადამკვირვებლო ორგანიზაციას მიეცა უფლება წარმოადგინოს 2, ხოლო თითოეულ თავმჯდომარეობის კანდიდატს 4 დამკვირვებელი ( ჯამში, დაახლოებით 40-მდე დამკვირვებელი ) , რომელთაც თავისუფლად შეეძლებათ, როგორც არჩევნებზე უშუალო დაკვირვება, ისე აუდიო-ვიდეო გადაღების განხორციელება ( ხმის მიცემის ფარულობის დაცვით ) . დამატებით გათვალისწინებულია არჩევნების მსვლელობის სრული ვიდეო-ტრანსლაცია რეალურ დროში, სპეციალური მონიტორის საშუალებით.
აღნიშნულ საკითხებზე და ასევე, კრებაზე დამკვირვებელთა წარდგენის პროცედურებზე გთხოვთ, დეტალურად იხილოთ რეგლამენტი – https://shorturl.at/7RV5H
მოვუწოდებთ არჩევნებში მონაწილე კანდიდატებს, იხელმძღვანელონ იურიდიული პროფესიის ღირსების, ინდივიდუალური ადვოკატის კარგი რეპუტაციისა და კოლეგიალური პატივისცემის პრინციპებით და თავი შეიკავონ ასოციაციის საარჩევნო პროცესის ხელოვნური დისკრედიტაციისა და ყალბი ინფორმაციის გავრცელებისგან.
ასოციაცია წარმატებას უსურვებს არჩევნებში მონაწილე ყველა კანდიდატს !
დაბოლოს, იმას ვიტყოდი, რომ ჩემი კოლეგების ასეთი დაპირისპირების მხილველი ბედნიერი ნამდვილად არ ვარ და მიმაჩნია, რომ იურისტის პროფესია ყველა ჩვენთაგანს მეტ თავდაჭერილობასა და პასუხისმგებლობას გვაკისრებს, რადგან ამ საჯარო პერიპეტიებს ჩვენი ამჟამინდელი, ან თუნდაც მომავალი კლიენტები შესაძლოა, თვალს ადევნებდნენ და ნამდვილაად არასახარბიელოა ასეთ დავებში ამის წარმოდგენა. ასე რომ, კოლეგებო, საქმენმა ჩვენმა წარმოგვაჩინოს.
ირაკლი კერესელიძე
,,GEO NEWS”-ის – აღმასრულებელი რედაქტორი, იურისტი
,,GEO NEWS”
