BLOG

• By Keti Khomeriki
• In მსოფლიო

სომხეთი აზერბაიჯანს სთავაზობს, ერთდროულად მოაწეროს ხელი სამშვიდობო შეთანხმებასა და ეუთო-ს ერთობლივ განცხადებას მინსკის ჯგუფის სტრუქტურების დაშლის შესახებ

სომხეთის პრემიერ-მინისტრის, ნიკოლ ფაშინიანის განცხადებით, ეუთო-ს მინსკის ჯგუფს, სულ მცირე, დე ფაქტო აქვს უფრო ფართო კონტექსტი, სომხეთს კი სურს იყოს დარწმუნებული, რომ აზერბაიჯანი არ განიხილავს მინსკის ჯგუფის დაშლას, როგორც ნაბიჯს, აზერბაიჯანის ტერიტორიაზე სომხეთ-აზერბაიჯანის კონფლიქტის დახურვისა და სომხეთის რესპუბლიკის სუვერენულ ტერიტორიაზე გადატანისთვის.

ფაშინიანის თქმით, სწორედ ამიტომ სთავაზობს სომხეთი აზერბაიჯანს ორ შეთანხმებაზე ერთდროულად ხელმოწერას. რაც შეეხება სომხეთის კონსტიტუციაში შესწორების შეტანის მოთხოვნას აზერბაიჯანის მხრიდან, ნიკოლ ფაშინიანმა აღნიშნა, რომ სომხეთის კონსტიტუციის ინტერპრეტაციაზე საკონსტიტუციო სასამართლომ შეუქცევადი გადაწყვეტილებით დაადგინა, რომ კონსტიტუციაში არ არსებობს ტერიტორიული პრეტენზია აზერბაიჯანის ან რომელიმე სხვა ქვეყნის მიმართ, რაც არის უმაღლესი იურიდიული ძალის მქონე გადაწყვეტილება და შეუქცევადია.

„მიუხედავად ყველა სირთულისა, მთავრობა და პირადად მე არ გადავუხვევთ მშვიდობის დღის წესრიგს. აშკარაა, რომ ზოგიერთი ძალა, როგორც სომხეთში, ისე სომხეთის ფარგლებს გარეთ, ომის პროპაგანდას ახორციელებს ყოველდღიურად და ახორციელებს კონკრეტულ ქმედებებს, რომლებიც მიმართულია მის განხორციელებაზე. ამ ქმედებებს შორის, აზერბაიჯანის საომარი რიტორიკა გამოირჩევა, რიტორიკასთან ერთად, რომელიც გამოიხატება ცრუ ბრალდებებით სომხეთის წინააღმდეგ ცეცხლის შეწყვეტის დარღვევისა და აზერბაიჯანის შეიარაღებული ძალების მხრიდან ცეცხლის შეწყვეტის რეჟიმის ხშირი, თუ არა ყოველდღიური, დარღვევით. ეს დარღვევები ძირითადად არამიზნობრივ ხასიათს ატარებს, თუმცა ბოლო ერთი თვის განმავლობაში სიუნიქის რაიონის სოფელ ხნაწახზე სროლის ორი კონკრეტული შემთხვევა დაფიქსირდა. აღნიშნული სროლები ან აზერბაიჯანის შეიარაღებულ ძალებში უდისციპლინობის შედეგია, ან მიზნად ისახავს აღნიშნული დასახლებების მოსახლეობაზე ფსიქოლოგიური ზეწოლას.

კიდევ ერთხელ ვიმეორებ, რომ სომხეთის არმიას მივეცი მკაფიო ბრძანება არ დაარღვიოს ცეცხლის შეწყვეტის რეჟიმი და სომხეთის რესპუბლიკა მზადაა გამოიძიოს ინფორმაცია ჩვენი არმიის მიერ ცეცხლის შეწყვეტის რეჟიმის დარღვევის შესახებ. ომს გამართლება არ აქვს. სომხეთმა და აზერბაიჯანმა აღიარეს ერთმანეთის ტერიტორიული მთლიანობა, სუვერენიტეტი, საერთაშორისოდ აღიარებული საზღვრების ხელშეუხებლობა და ძალის გამოყენებისა და ძალის მუქარის დაუშვებლობა. ამ რეალობიდან გამომდინარე, მოვუწოდებ სომხეთსა და აზერბაიჯანში მოქმედ ყველა ძალასა და პირს, გამოიჩინონ უკიდურესად პასუხისმგებლობა, არ გააკეთონ განცხადებები, რომლებიც პირდაპირ თუ ირიბად ეწინააღმდეგება ზემოხსენებულ ლოგიკას. სომხეთისა და აზერბაიჯანის ხალხები იმსახურებენ მშვიდობას და მშვიდობიან თანაცხოვრებას. არ იქნება ომი, იქნება მშვიდობა“, – განაცხადა ნიკოლ ფაშინიანმა.