,,ქართული ოცნება” სააკაშვილის სისხლიანი რეჟიმის დანაშაულების გამოძიებას იწყებს
ჯერ კიდევ 26 ოქტომბრამდე დაანონსებული ინიციატის სისრულეში მოყვანა იწყება. ,,ქართული ოცნება” ყოფილი სახელისუფლებო გუნდის დანაშაულებების გამოძიებას იწყებს და ამ მოტივით დროებით საპარლამენტო საგამოძიებო კომისიას ქმნის. გამოკითხვაზე დაიბარებენ ყველა იმ ყოფილ მაღალჩინოსანს, რომელიც მაშინდელი სისხლიანი რეჟიმის დროს პასუხისმგებელი იყო. დროებითი საპარლამენტო კომისია კი მუშაობის დასრულების შემდეგ, მასალებს შემდგომი რეაგირებისთვის პროკურატურას წარუდგენს.
საუბარია 2003 წლიდან 2012 წლამდე პერიოდის დანაშაულებრივ ქმედებებზე, ანუ იმ პერიოდზე, როცა ,,ნაციონალური მოძრაობა” ხელისუფლებაში იყო.
როგორც ,,ქართულ ოცნებაში” ამბობენ, მნიშვნელოვანია ქვეყნის გათავისუფლება რადიკალური ოპოზიციისგან.
საკითხის გააქტიურებას არასერიოზულად მიიჩნევენ ,,ნაციონალურ მოძრაობაში”. ბრალდების მთავარი ადრესატები და სისხლიანი რეჟიმის შემქმნელები დუმან. ერთადერთი, ვინც მედიასთან კომენტარი გააკეთა ახალგაზრდა ,,ნაციონალი” ირაკლი ფაველიშვილია, რომელმაც რამდენიმე წუთი ისაუბრა და ეს დროც მმართველი პარტიის კრიტიკას დაუთმო.
ირაკლი გუნია
