- By Keti Khomeriki
- In მსოფლიო
ჩრდილოეთ კორეამ რუსეთთან თავდაცვის შეთანხმების რატიფიცირება განახორციელა
ჩრდილოეთ კორეამ რუსეთთან თავდაცვის შეთანხმების რატიფიცირება განახორციელა. განკარგულებას ხელი ქვეყნის ლიდერმა, კიმ ჩენ ინმა მოაწერა. ინფორმაციას ამის შესახებ „დოიჩე ველე“ ავრცელებს.
ხელშეკრულება მხარეებს შეიარაღებული თავდასხმის შემთხვევაში ერთმანეთის დახმარებას ავალდებულებს. ადგილობრივი მედიის ცნობით, შეთანხმება ძალაში შევა დაუყოვნებლივ, როგორც კი მხარეები რატიფიცირებულ სიგელებს ოფიციალურად გაცვლიან.
აღსანიშნავია, რომ რუსულმა მხარემ დოკუმენტის რატიფიცირება გასულ კვირას განახორციელა და მას ხელი უკვე მოაწერა პრეზიდენტმა ვლადიმირ პუტინმა.
ცნობისთვის, რუსეთსა და ჩრდილოეთ კორეას შორის სტრატეგიული პარტნიორობის შესახებ შეთანხმება მიმდინარე წლის ივნისში გაფორმდა, როდესაც ვლადიმირ პუტინი ფხენიანს ვიზიტით ეწვია.
რამდენიმე დღის წინ, უკრაინამ განაცხადა, რომ ქვეყნის შეიარაღებულ ძალებს ჩრდილოეთ კორეის სამხედროებთან კურსკის რეგიონში მოუწიათ შეტაკება.
