- By Keti Khomeriki
- In მსოფლიო
ურსულა ფონ დერ ლაიენი – ორი თვეა, ღაზაში ჰუმანიტარული დახმარება არ შედის, დახმარებამ დაუყოვნებლივ უნდა მიაღწიოს მოსახლეობამდე და ბლოკადა მოიხსნას
ევროკომისიის პრეზიდენტმა, ურსულა ფონ დერ ლაიენმა განაცხადა, რომ ღაზაში არსებული ჰუმანიტარული მდგომარეობა მიუღებელია.
„ორი თვეა, ღაზაში ჰუმანიტარული დახმარება არ შედის. დახმარებამ დაუყოვნებლივ უნდა მიაღწიოს მოსახლეობამდე და ბლოკადა მოიხსნას“, – განაცხადა ურსულა ფონ დერ ლაიენმა ლონდონში ბრიტანეთისა და ევროკავშირის მოლაპარაკებების შემდეგ.
ევროკომისიის პრეზიდენტის თქმით, ჰუმანიტარული დახმარება არასდროს უნდა გახდეს პოლიტიკური იარაღი.
ღაზაში არსებული ვითარება უარყოფითად შეაფასა ბრიტანეთის პრემიერ-მინისტრმა, კირ სტარმერმაც და აღნიშნა, რომ ბრიტანეთი მოკავშირეებთან ერთად გეგმავს კონფლიქტის მოგვარებას.
ამასთან, ევროკავშირი 2025-2027 წლებში პალესტინისთვის 1.6 მილიარდ ევროს დახმარებას გამოყოფს.
ისრაელმა ღაზაზე ჰუმანიტარული ბლოკადა მარტში, ცეცხლის შეწყვეტიდან ორი თვის შემდეგ დააწესა.
