ექსკლუზივი : ტოვებს თუ არა კობახიძე პრემიერის პოსტს ?

ექსკლუზივი : ირაკლი კობახიძემ შესაძლოა პრემიერ-მინისტრის თანამდებობა უახლოეს მომავალში დატოვოს ?

„GEO NEWS“-ის ძალოვანი კონფიდენციალური წყაროს ინფორმაციით, უახლოეს მომავალში საქართველოს პრემიერ-მინისტრი ირაკლი კობახიძე შესაძლოა თანამდებობიდან გადადგეს.

ჩვენი წყაროს ცნობით, ხელისუფლების შიგნით ბოლო პერიოდში აქტიურად განიხილება სამთავრობო გუნდის მნიშვნელოვანი ცვლილებების საკითხი, მათ შორის – პრემიერ-მინისტრის შესაძლო ჩანაცვლება.

ამ ეტაპზე აღნიშნული ინფორმაცია ოფიციალურად არ დასტურდება და პრემიერ-მინისტრის გადადგომის შესახებ გადაწყვეტილება საჯაროდ გამოცხადებული არ არის. თუმცა, თუ წყაროს ცნობები დადასტურდა, ეს შესაძლოა, ხელისუფლების შიგნით მიმდინარე უფრო ფართო პოლიტიკური და საკადრო პროცესების ნაწილი იყოს.

„GEO NEWS“-ის ინფორმაციით, კობახიძის შესაძლო წასვლის ერთ-ერთ ფაქტორად შესაძლოა განიხილებოდეს მის უახლოეს გარემოცვასთან დაკავშირებული საკითხებიც.

განსაკუთრებით ყურადღებას იპყრობს მამუკა მდინარაძის მიმართ არსებული კითხვები, სწორედ იმ პირის მიმართ, რომელიც წლების განმავლობაში მმართველი გუნდის ერთ-ერთ ყველაზე გავლენიან და პრემიერის პოლიტიკურ გუნდთან დაახლოებულ ფიგურად აღიქმებოდა.

საზოგადოებისთვის მდინარაძის საქმიანობასთან დაკავშირებით სხვადასხვა პერიოდში არაერთი კითხვა და პოლიტიკური შეფასება არის ცნობილი.

ჩვენი ძალოვანი წყაროს ინფორმაციით, არ არის გამორიცხული, მომავალში ამ საკითხებთან დაკავშირებით დამატებითი მასალები და, მათ შორის, შესაძლო კორუფციული ხასიათის ბრალდებებიც გახდეს საჯარო.

ამასთან, „GEO NEWS“ ხაზგასმით აღნიშნავს, რომ ამ ეტაპზე კონკრეტული კორუფციული დანაშაულის არსებობის ფაქტს არ ამტკიცებს. საუბარია წყაროს მიერ მოწოდებულ ინფორმაციაზე და შესაძლო შემდგომ განვითარებაზე, რომლის სისწორეც შესაბამისმა საგამოძიებო ორგანოებმა და ფაქტობრივმა მტკიცებულებებმა უნდა დაადასტურონ.

თუ პრემიერ-მინისტრის შესაძლო გადადგომის შესახებ ინფორმაცია დადასტურდა, მოსალოდნელია, რომ ამას მოჰყვეს არა მხოლოდ მთავრობის საკადრო ცვლილებები, არამედ მმართველი გუნდის შიგნით გავლენების გადანაწილების პროცესიც.

„GEO NEWS“ აღნიშნულ თემაზე მუშაობას განაგრძობს და, ახალი ინფორმაციის მიღების შემთხვევაში, მკითხველს დამატებით დეტალებს ოპერატიულად მიაწვდის.

ქეთი ხომერიკი, ირაკლი კერესელიძე

,,GEO NEWS”