სურსათის ეროვნულმა სააგენტომ მარნეულში სავარაუდო ინტოქსიკაციის ფაქტზე მოკვლევა დაიწყო
სურსათის ეროვნულმა სააგენტომ მარნეულში სავარაუდო ინტოქსიკაციის ფაქტზე მოკვლევა დაიწყო.
როგორც სურსათის ეროვნული სააგენტოს განცხადებაშია ნათქვამი, სააგენტოში შეტყობინება შევიდა მარნეულის მუნიციპალიტეტში ექვსი ადამიანის, მათ შორის, ერთი ბავშვის საკონდიტრო ნაწარმით სავარაუდო ინტოქსიკაციის შესახებ.
„ინფორმაციის მიღებისთანავე სააგენტოს ქვემო ქართლის დეპარტამენტმა დაიწყო მოკვლევა. ინსპექტირების ჯგუფი ობიექტზე, სადაც, მოქალაქის განმარტებით, ტორტი შეიძინეს, სახელმწიფო კონტროლის ფარგლებში არაგეგმურ ინსპექტირებას ჩაატარებს. გარდა ამისა, სააგენტო კოორდინაციაშია დაავადებათა კონტროლისა და საზოგადოებრივი ჯანმრთელობის ეროვნულ ცენტრთან და ინფორმაციის დაზუსტებისთანავე დამატებით ვაცნობებთ საზოგადოებას“, – ნათქვამია სურსათის ეროვნული სააგენტოს განცხადებაში.
