უსაფუძვლო ბრალდება გენერალ ანზორ ჩუბინიძის მიმართ და აბსურდული დისკრედიტაციის მცდელობა
უსაფუძვლო ბრალდება ანზორ ჩუბინიძისადმი დავითაძის საქმის ფარგლებში – რას ამბობს მსჯავრდებულის მამა და რას ვერ ადასტურებს გავრცელებული კადრები !
მსჯავრდებული გიორგი დავითაძის მამის განცხადებაში ერთ-ერთი მნიშვნელოვანი გარემოება სახელმწიფო დაცვის სპეციალური სამსახურის ხელმძღვანელობასთან კომუნიკაციას უკავშირდება.
ავთანდილ დავითაძის განმარტებით, მან პირადად, წერილობით მიმართა სახელმწიფო დაცვის სპეციალური სამსახურის უფროსს, გენერალ-ლეიტენანტ ანზორ ჩუბინიძეს და ასევე სთხოვა ანი მიროტაძეს, დაკავშირებოდა მას სატელეფონო ზარით. როგორც დავითაძის მამა აცხადებს, აღნიშნულ მიმართვებსა და თხოვნას საბოლოოდ ანზორ ჩუბინიძისგან პასუხი არ მოჰყოლია.
ფაქტია, რომ ანზორ ჩუბინიძე სახელმწიფო დაცვის სპეციალური სამსახურის მოქმედი ხელმძღვანელია და უწყებას 2014 წლის დეკემბრიდან ხელმძღვანელობს. თავად სამსახურის ოფიციალური ინფორმაციით, მისი საქმიანობის ძირითადი სფერო სახელმწიფო დაცვის ღონისძიებების ორგანიზება და დაცული პირებისა და ობიექტების უსაფრთხოების უზრუნველყოფაა.
ამასთან, თავად საკითხი, რომელზეც დავითაძის მამა საუბრობს, ბუნებრივად უნდა შეფასდეს მისი კონკრეტული შინაარსისა და სახელმწიფო დაცვის სპეციალური სამსახურის კანონით განსაზღვრული უფლებამოსილების გათვალისწინებით.
შესაბამისად, გენერალ ჩუბინიძისგან კონკრეტული მოქმედების მოთხოვნა ავტომატურად არ ნიშნავს, რომ საკითხი მისი პირდაპირი სამსახურებრივი კომპეტენციის ნაწილი იყო.
თუმცა, „GEO NEWS“ მიიჩნევს, რომ სწორედ ამიტომ არის მნიშვნელოვანი ამ გარემოების გარკვევა :
თუ მოქალაქემ მართლაც წერილობით მიმართა მაღალი რანგის სახელმწიფო მოხელეს და დამატებით კომუნიკაციის მცდელობაც განხორციელდა, საზოგადოებისთვის საინტერესოა, რა ბედი ეწია ამ მიმართვას – იქნა თუ არა იგი მიღებული, ვის გადაეცა განსახილველად და არსებობდა თუ არა რეაგირების სამართლებრივი ან ორგანიზაციული საფუძველი.
ამავე დროს, გავრცელებული ვიდეოკადრების შეფასებისას განსაკუთრებული სიფრთხილეა საჭირო. კადრები თავისთავად ერთმნიშვნელოვნად ვერ ადასტურებს, არც კონკრეტული სამართალდარღვევის ფაქტს და არც მასში მონაწილე პირების განზრახვას. არსებული ვიზუალური მასალა შეიძლება სხვადასხვა გარემოებით აიხსნას და, მათ შორის, არ არის გამორიცხული, რომ საქმე რეჟიმულ ან სპეციალური ღონისძიების ფარგლებში განხორციელებულ მოქმედებას ეხებოდეს. ამის დადგენა მხოლოდ სრული კონტექსტის, მონაწილე პირთა განმარტებებისა და შესაბამისი ოფიციალური დოკუმენტაციის შესწავლის საფუძველზეა შესაძლებელი.
ამიტომ, ამ ეტაპზე მთავარი კითხვა არა წინასწარი დასკვნის გამოტანა, არამედ ფაქტების გადამოწმებაა – არსებობდა თუ არა დავითაძის მამის წერილობითი მიმართვა, მიიღო თუ არა იგი სახელმწიფო დაცვის სპეციალურმა სამსახურმა, განხორციელდა თუ არა შესაბამისი რეაგირება და რა იყო იმ კონკრეტული ღონისძიების სამართლებრივი და ფაქტობრივი საფუძველი, რომლის ამსახველი კადრებიც გავრცელდა.
ჩვენ მიგვაჩნია, რომ კონკრეტული მძიმე დარღვევის დადასტურების შემთხვევაში, გენერალი ჩუბინიძის რეაგირება აუცილებლად იქნებოდა კანონშესაბამისი და მკაცრად ადეკვატური.
მსჯავრდებულ დავითაძის მამის განცხადება ტელეეთერით ერთმნიშვნელოვნად ემსახურებოდა გენერალ-ლეიტენანტი ანზორ ჩუბინიძის გულისხმიერებისა და ადამიანების თანადგომის დამკვიდრებული იმიჯის ხელყოფას, რაც, რა თქმა უნდა, ყოველ ჯერზე წარუმატებელი იქნება.
ქეთი ხომერიკი
,,GEO NEWS”
