- By Keti Khomeriki
- In მსოფლიო
დონალდ ტრამპი – შეუძლებელია, ცუდი რამ ვთქვა ვლადიმერ პუტინზე, შემდეგ კი ტელეფონი ავიღო და ვკითხო, როგორ მიდის სამშვიდობო შეთანხმება, მე არ ვარ რომელიმე ერთი ქვეყნის მხარეს
აშშ-ის პრეზიდენტმა, დონალდ ტრამპმა უკრაინის პრეზიდენტთან, ვოლოდმირ ზელენსკისთან შეხვედრისას განაცხადა, რომ ის არ არის რომელიმე ერთი ქვეყნის მხარეს.
როგორც ტრამპმა აღნიშნა, შეუძლებელია, ცუდი რამ თქვას რუსეთის ლიდერზე, შემდეგ კი ტელეფონი აიღოს და ვლადიმერ პუტინს ჰკითხოს, როგორ მიდის სამშვიდობო შეთანხმება, რადგან შეთანხმების მიღწევა ასე არ ხდება.
მისივე თქმით, ვოლოდიმირ ზელენსკი სავსეა პუტინის მიმართ ზიზღით.
ამასთან, დონალდ ტრამპმა ვოლოდიმირ ზელენსკი „მესამე მსოფლიო ომით თამაშში“ დაადანაშაულა.
„შენ თამაშობ მილიონობით ადამიანის სიცოცხლით, შენ თამაშობ მესამე მსოფლიო ომით და რასაც აკეთებ, ამ ქვეყნის უპატივცემულობაა“, – განუცხადა ტრამპმა ზელენსკის.
ტრამპის თქმით, ზელენსკი „მადლიერი“ უნდა იყოს.
უკრაინის ლიდერს „უპატივცემულობაში“ დასდო ბრალი აშშ-ის ვიცე-პრეზიდენტმა, ჯეი დი ვენსმა. პრეზიდენტებს შორის სიტყვიერი შეკამათება ჯეი დი ვენსის კომენტარმა გამოიწვია, რომ „ცეცხლის შეწყვეტაზე შეთანხმების მიღწევის გზა არის დიპლომატია და ამ გზას მიჰყვება ტრამპი“.
ზელენსკიმ ვიცე-პრეზიდენტს უთხრა, რომ რუსეთმა უკრაინის ოკუპაცია 2014 წლიდან დაიწყო. ასევე აღნიშნა, რომ ვლადიმერ პუტინმა, საფრანგეთის პრეზიდენტთან, ემანეულ მაკრონთან და გერმანიის ყოფილ კანცლერთან, ანგელა მერკელთან ერთად, ცეცხლის შეწყვეტის შეთანხმებასაც მოაწერა ხელი, თუმცა, ამის მიუხედავად, სრულმასშტაბიანი ომი წამოიწყო და ეს ყველაფერი ხდება მაშინ, როდესაც ამერიკის ადმინისტრაციაში არაერთი ლიდერი შეიცვალა.
ამასთან, ტრამპისა და ვენსის გაღიზიანება გამოიწვია ზელენსკის კომენტარმა, სადაც უკრაინის პრეზიდენტმა აღნიშნა, რომ ომის დროს პრობლემები ყველას აქვს, მაგრამ ისინი ახლა ამას ვერ გრძნობენ, რადგან მათ შორის „ლამაზი ოკეანეა“, თუმცა იგრძნობენ, რაზეც ტრამპმა განუცხადა, რომ ზელენსკი ახლა არ არის იმ პოზიციაში, რომ მათ უკარნახოს, რას იგრძნობენ.
„თქვენს ქვეყანას დიდი პრობლემები აქვს. ჩვენ ამ სულელი პრეზიდენტის საშუალებით 350 მილიარდი დოლარის სამხედრო აღჭურვილობა მოგეცით. ჩვენი სამხედრო აღჭურვილობა რომ არ გქონოდათ, ეს ომი ორ კვირაში დასრულდებოდა“, – თქვა ტრამპმა, რაზეც ზელენსკიმ უპასუხა: „პუტინისგან სამი დღე მაქვს მოსმენილი“.
