- By Keti Khomeriki
- In მსოფლიო
რეჯეფ თაიფ ერდოღანი – მოვუწოდებ იმ სახელმწიფოებს, რომლებსაც პალესტინის სახელმწიფოს აღიარება ჯერ არ გამოუცხადებიათ, ზომები დაუყოვნებლივ მიიღონ
თურქეთის პრეზიდენტმა, რეჯეფ თაიფ ერდოღანმა გაერო-ს გენერალური ასამბლეის სესიაზე სხვა ქვეყნებს პალესტინის სახელმწიფოს აღიარებისკენ მოუწოდა, მათ კი, ვინც ეს გადაწყვეტილება უკვე მიიღო, მადლობა გადაუხადა.
„მადლობას ვუხდი ყველა ქვეყანას, რომელმაც პალესტინის სახელმწიფოს აღიარების შესახებ გამოაცხადა. მოვუწოდებ იმ სახელმწიფოებს, რომლებსაც ეს გადაწყვეტილება ჯერ არ მიუღიათ – ზომები დაუყოვნებლივ მიიღეთ“, – განაცხადა რეჯეფ თაიფ ერდოღანმა.
ამასთან, გაერო-ს გენერალური ასამბლეის დებატებზე სიტყვით გამოსვლისას ერდოღანმა ქვეყნებს ღაზაში ცეცხლის შეწყვეტისკენაც მოუწოდა და აღნიშნა, რომ „სექტორში გენოციდი უკვე 700 დღეზე მეტია, გრძელდება და ამ შეხვედრის დროსაც კი უდანაშაულო ადამიანები იღუპებიან.“ როგორც თურქეთის პრეზიდენტმა განაცხადა, ამაზე პასუხისმგებელმა პირებმა პასუხი საერთაშორისო სამართლის შესაბამისად უნდა აგონ.
