საავტომობილო გზების დეპარტამენტი – ტყიბული-ამბროლაურის დამაკავშირებელი გზის რეაბილიტაცია აქტიურად მიმდინარეობს
საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი შიდასახელმწიფოებრივი მნიშვნელობის ქუთაისი(მოწამეთა)-ტყიბული- ამბროლაურის საავტომობილო გზაზე ტყიბული-ამბროლაურის დამაკავშირებელი ცხრაკილომეტრიანი მონაკვეთის (ნაქერალას უღელტეხილი) რეაბილიტაციას ახორციელებს.
„აღნიშნული გზა ერთმანეთთან აკავშირებს იმერეთსა და რაჭას. გზა გადის რამდენიმე სოფელთან, სხვადასხვა ტურისტულ ობიექტთან და ეკლესია-მონასტრებთან. შესაბამისად, საგზაო ინფრასტრუქტურის მოწესრიგება მნიშვნელოვანია სოციალურ-ეკონომიკური მდგომარეობის გაუმჯობესებისა და ტურიზმის განვითარებისთვის.
პროექტის ფარგლებში, რეაბილიტაცია უტარდება გზის სავალ ნაწილს, დაიგო ასფალტ-ბეტონის საფარი, მოეწყობა ხელოვნური ნაგებობები, მათ შორის, ახალი რკინა-ბეტონის მილები, გაბიონის კედლები, რკინა-ბეტონის კიუვეტები და სხვა.
გარდა ამისა, გათვალისწინებულია მიერთებების, ადგილობრივი და მოსახლეობის ეზოში შესასვლელებისა და საგზაო ნიშნების მოწყობა. მოინიშნება გზის სავალი ნაწილიც“, – აღნიშნულია საავტომობილო გზების დეპარტამენტის ინფორმაციაში.
უწყების ცნობით, პროექტი სახელმწიფო ბიუჯეტიდან რვა მილიონ ლარამდე ფინანსდება.
