გიორგი ბახუაშვილი სუს-ის უფროსის პირველ მოადგილედ დაინიშნა
სახელმწიფო უსაფრთხოების სამსახურის ახალ უფროსის, თამაზ ბორაშვილს მოადგილეთა შემადგენლობის როტაცია მოხდა. შესაბამისი ბრძანებები საქართველოს მთავრობამ 16 სექტემბრით გამოსცა.
16 სექტემბრით დათარიღებული ბრძანებით, გიორგი ბახუაშვილი სუს-ის უფროსის პირველ მოადგილედ დაინიშნა.
ბახუაშვილი 2026 წლის ივლისიდან უკვე იკავებდა სუს-ის უფროსის მოადგილის თანამდებობას, მანამდე კი, 2026 წლის ივნისში, შს მინისტრის მოადგილედ იყო დანიშნული. წლების განმავლობაში ბახუაშვილი ბიძინა ივანიშვილის პირად დაცვაში მუშაობდა.
მარიამ ტაბატაძე კვლავ სუს-ის უფროსის მოადგილედ დამტკიცდა. ის ამ პოსტს 2026 წლის მაისიდან იკავებდა, როცა გეკა გელაძემ იგი შსს-დან სუს-ში გადაიყვანა. მანამდე კი შს მინისტრის მოადგილე იყო.
ჩვენთვის უცნობია, ინარჩუნებს თუ არა პოსტს ალექსანდრე მაისურაძე, რომელიც სუს-ის უფროსის მოადგილედ 2025 წლის სექტემბერში დაინიშნა. მანამდე ის იუსტიციის მინისტრის მოადგილე იყო.
მკითხველს შევახსენებთ, რომ სუს-ის უფროსის პოსტიდან გეკა გელაძის გადადგომის შემდეგ, უწყების ხელმძღვანელი თამაზ ბორაშვილი გახდა, ხოლო პირველი მოადგილე ლაშა მაღრაძე კვლავ იუსტიციის სამინისტროში დაბრუნდა – მინისტრის მოადგილედ დაინიშნა.
მოამზადა – ირაკლი მაისურაძემ
,,GEO NEWS”
