- By Keti Khomeriki
- In მსოფლიო
ნიკოლ ფაშინიანი – ჩვენ ერთ, სომხურ სკამზე ვსხედვართ, ორი არ გვჭირდება
ჩვენ ერთ, სომხურ სკამზე ვსხედვართ, – ასე უპასუხა, სომხეთის პრემიერ-მინისტრმა, ნიკოლ ფაშინიანმა რუსი ჟურნალისტის კითხვას, რომ სომხეთი „ორ სკამზე ჯდომას“ ცდილობს.
„რატომ ორი სკამი? ჩვენ ერთ, სომხურ სკამზე ვსხედვართ, ამიტომ ორი არ გვჭირდება“, – აღნიშნა სომხეთის პრემიერ-მინისტრმა.
ამასთან, ფაშინიანმა რუსი ჟურნალისტის კითხვაზე პასუხისას განაცხადა, რომ ერევანი აპირებს, გააგრძელოს დაბალანსებული საგარეო პოლიტიკა.
„ჩვენ ვგეგმავთ დაბალანსებული საგარეო პოლიტიკის გაგრძელებას, როგორც უკვე ვთქვით“, – აღნიშნა ფაშინიანმა ნიუ იორკში, სადაც გაერო-ს გენერალურ ასამბლეაზე იმყოფება.
ჟურნალისტმა ფაშინიანს ასევე ჰკითხა ევროპულ ბაზარზე სომხეთის ექსპორტის პერსპექტივების შესახებ. ჟურნალისტის თქმით, ევროპულმა მხარემ განაცხადა, რომ სომხური სასოფლო-სამეურნეო პროდუქციის 99 პროცენტი, მათ შორის ხილი და ბოსტნეული შეიძლება, შევიდეს ევროკავშირის ბაზარზე და ჰკითხა, შიშობს თუ არა სომხეთის პრემიერ-მინისტრი, რომ ევროპელები არ შეასრულებენ დაპირებებს.
„რატომ? რატომ უნდა მოგვატყუონ? ჩვენ ვცდილობთ, ვიყოთ გულწრფელი და გახსნილი ყველა პარტნიორთან და ვიმედოვნებთ, ორმხრივად ვიმოქმედებთ“, – განაცხადა სომხეთის პრემიერ-მინისტრმა.
