დავით სონღულაშვილი თურქეთის ელჩს, მუსტაფა თურქერ არის შეხვდა
საქართველოს გარემოს დაცვისა და სოფლის მეურნეობის მინისტრი დავით სონღულაშვილი საქართველოში თურქეთის რესპუბლიკის ელჩს, მუსტაფა თურქერ არის შეხვდა.
გარემოს დაცვისა და სოფლის მეურნეობის სამინისტროს ცნობით, შეხვედრაზე მხარეებმა განიხილეს ქვეყნებს შორის სტრატეგიული პარტნიორობის ფარგლებში სავაჭრო-ეკონომიკური ურთიერთობების შემდგომი გაღრმავების პერსპექტივები და საქართველოში საინვესტიციო შესაძლებლობები.
„დავით სონღულაშვილმა თურქეთის რესპუბლიკაში თავისი სამუშაო ვიზიტის მნიშვნელობის შესახებაც ისაუბრა და ელჩს მადლობა გადაუხადა ვიზიტის მაღალ დონეზე ორგანიზებისთვის. მინისტრის განცხადებით, უწყებებს შორის საქმიანი შეხვედრები არსებული პარტნიორობის გაღრმავებასა და თანამშრომლობის ახალი შესაძლებლობების განვითარებას უწყობს ხელს.
მინისტრმა ვრცლად ისაუბრა საექსპორტო პოტენციალის მქონე აგრარული პროდუქციის შესახებ და ყურადღება ქართულ თხილზე, თაფლსა და ღვინოზე გაამახვილა.
საუბარი შეეხო სოფლის მეურნეობის, ნარჩენების მართვის, სატყეო და სამთო-მოპოვების სექტორში თანამშრომლობის გაღრმავებისა და გამოცდილების გაზიარების მნიშვნელობის საკითხებს.
მუსტაფა თურქერ არის განცხადებით, საქართველო თურქეთისთვის მნიშვნელოვანი პარტნიორია და არსებობს სრული მზაობა ორმხრივად სასარგებლო პროექტების განხორციელებისთვის.
გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ლაშა დოლიძე და საერთაშორისო ურთიერთობებისა და ევროინტეგრაციის დეპარტამენტის ხელმძღვანელი დავით ჩიტაიშვილი ესწრებოდნენ“, – აღნიშნულია ინფორმაციაში.
